Pront per l’acziun sco ti – Tia polizia chantunala
Nus faschain segir il Grischun
Nus faschain segir il Grischun – di e notg. Per nossas 200’000 abitantas ed abitants dal Grischun e per milliuns da giasts dal chantun. Tar nus chattas ti in job che fa senn, che ta renda losch.
Uschè pretensius sco ti – Tia polizia chantunala
Ti es gugent en la natira? Ti passentas bler temp cun tia famiglia? Ti has in hobi che ti has fitg gugent? Tar la polizia sas ti cumbinar fitg bain il temp liber, il sport, la famiglia e la professiun. Nus pretendain bain bler da tai – ma nus purschain era bainquant. Per exempel ina buna work-life-balance. Ed anc dapli:
Spiert da team e buna atmosfera da lavur
Respect, toleranza e stima
Egualitad da las schanzas e fairness
Pussaivladads multifaras d’emprender e da sa sviluppar
Pensums interessants che fan senn
Ina cultura da manar moderna
ed ina paja correcta
Secturs d’activitad
Polizia regiunala
Ti controllas e segireschas, ti investigheschas e retschertgas, ti cusseglias e sustegnas: Tar la polizia regiunala lavuras ti sco allroundra, sco allrounder. Variaziun è garantida qua, mintga di è auter. Ma ina chaussa resta: Tes job serva ad umans en tia regiun e va bain a prà cun tia vita.
Polizia da segirezza
Ti raivas sin muntognas, treneschas cun chauns, vas en helicopters e mainas acziuns or da l’aria u pli gugent per terra cun dronas da la polizia. Ti mainas gugent tractativas u procuras per ruaus ed urden tar occurrenzas grondas. Tar la polizia da segirezza es ti protectura e protectur, ti fas part ad acziuns spezialas sin aut nivel e sas contribuir ed amplifitgar tias abilitads – precis uschia sco ch’i va a prà cun tai e cun tia vita.
Manaschament-HR (resursas umanas)
Ti t’engaschas per collavuraturas e collavuraturs cumprovads e novs. En il manaschament da resursas umanas has ti in’ureglia averta e t’occupas dals giavischs da tut las collavuraturas e collavuraturs. En il center da cumpetenza per il svilup dal persunal t’engaschas ti per la scolaziun e la furmaziun cuntinuada, tant sin dumonda sco era da maniera proactiva. Ti es ina persuna communicativa e damanaivel als umans. Ina professiun che va a prà cun tai e cun tia vita.
Logistica e tecnica
En noss mund logistic da la Polizia chantunala dal Grischun surpiglias ti la responsabladad per in decurs perfetg. Tar ils servetschs ICT e radiofonia, material e vehichels t’occupeschas ti dal service, dal mantegniment e dal progress da nossa infrastructura. En il sectur da la recepziun e da la posta es ti l’emprima persuna da contact per nossa clientella e represchentas noss post da servetsch. Era en il sectur polizial da l’assistenza da persunas arrestadas, d’expulsiuns e da repatriaments pos ti esser activ. Tias cumpetenzas spezialas e tia moda da lavurar orientada fermamain a la clientella servan a nossa clientella ed a las policistas ed als policists per che quellas e quels sa possian focusar sin lur incumbensas principalas. En in job che va a prà cun tia vita.
Polizia criminala
Cun intuiziun da detectiv, cun meds moderns da la tactica e tecnica criminalistica e savens era cun infurmaziuns da la populaziun vegns ti a scuvrir delicts ed ad eruir ils delinquents. Sche ti has in nas fin versà e ta sentas bain era en il sectur digital ed es sin basa da tia sensibilitad criminalistica il pli tard al medem mument al lieu dal delict sco ils delinquents, lura va questa professiun perfetgamain a prà cun tia vita.
Secziun da commando e da traffic
En la secziun da commando e da traffic procuras ti per process senza incaps entaifer la polizia chantunala ed has la survista cumplaina. Saja quai sco policista u policist scolà u scu emploiada u emploià civil, ti ta pos spezialisar e ta sviluppar vinavant en differents secturs. Sco giurist en il servetsch giuridic, sco manadra da project en la logistica, sco referendari en la centrala operativa, referendaria en l’administraziun da traffic, u era sco diagnosticher d’autos en il center da controlla per il traffic pesant: ti chattas la plazza che va a prà cun tai en in ambient plain vita.
Communicaziun/prevenziun
Qua es ti en il center da la communicaziun. Tut las infurmaziun vegnan ensemen tar tai. Ti infurmeschas las gruppas en mira responsablas, tant a l’intern sco era vers l’extern. Sco spezialista/spezialist da prevenziun es ti responsabel per scolaziuns da la populaziun. Per exempel per la segirezza da traffic, la prevenziun da dependenza e la sensibilisaziun per crims. Ti das gugent vinavant tia savida, quia va a prà cun tai e cun tia vita.